Passejadas toponimicas - Pau Fabre

Passejadas toponimicas - Pau Fabre

De cronicas de toponimia occitana escriutas en lenga d'òc per Pau Fabre, especialista reconegut. Un libre agradiu e pasmens sabent.

Las Passejadas toponimicas de Pau Fabre : un polit libre de toponimia occitana. Escrich en lenga occitana de cap a cima, çò qu’es novèl e signe de la dignitat de l’occitan que pòt èsser, de vertat, lenga d’estudi e de descobèrta.
L’autor a volgut e sabut escriure un libre seriós e de bon legir dins un lengatge simple, mas sas Passejadas toponimicas demòran pasmens un libre vertadièrament sabent.
E mai saberut, Pau Fabre se sap rire e se trufa de las explicacions tròp imaginativas e fantasiosas qu’òm tròba tot còp e corregís amb vigor las errors dels mièges sabents o dels que se vòlon creire sabents.

Al long d’un seissantenat de cronicas, las Passejadas toponimicas de Pau Fabre son, fin finala, un viatge amorós per las sèrras, las combas e las vals, al briu de las aigas, en caminant per vilatges e vilas del País d’Òc.

Amb indèx alfabetic dels noms de luòcs presentats (p. 189 a 203), e referéncias bibliograficas (p. 207-209).

Edicions Letras d'òc.

L'autor:
Pau Fabre, nascut en 1935 a Nisàs (34) qu’estó pendent annadas professor a l’Universitat de Montpelhièr. Director de la colleccion Pichons classics occitans e de la Revue des Langues Romanes, qu’ei tanben l’autor  d’estudis de toponimia e d’antroponimia, d’obratges de linguistica e de publicacions dedicadas a la literatura occitana.