La chanson occitane 1965-1997 - Valérie Mazerolle

La chanson occitane 1965-1997 - Valérie Mazerolle

Trenta ans de cançon occitana, son de practicas artisticas e socialas, dels debats, dels enjòcs qu'implican non solament lo movement occitan mas encara la societat tot entièra...

Apareguda discretament dins las annadas 1960 coma auxiliara de la poesia, la cançon ven, aprèés Mai 1968, amb de cantaires coma Claude Marti, lo vector mai eficaç de la revindicacion occitana, sustot pendent las manifestacions grandas de Larzac (1973-1974). Se presenta coma un esplech politic destinat a fargar una identitat, mas tanben a recompausar de rapòrts socials e tornar negociar amb lo poder francés l'estatut de las lengas e de culturas minoritàrias.
Lo protest-song recuola puèi al profièch de reapropriacion fòlc del repertòri popular tradicional per de musicians mai plan formats, avent sovent practicat lo collectatge e beneficiant del sosten de las novèlas institucions culturalas.
Sensible als novèls corrents musicals (reggaes, rap), una tresena èrsa, a la fin de las annadas 1980, batejada per Claude Sicre “Linha Imaginot”, ne referéncia a la reflexion a l'encòp anti-centralista e anti-regionalista de Félix Castan, exprimís lo lagui d'un ancoratge social de sa practica, tant a Tolosa (los Fabulous Trobadors) qu'a Marselha (Massilia Sound System) o a Niça (Nux Vomica), e s'emplega, en occitan e en francés, a inventar un novèl folclòr urban, ferment de regeneracion de la vida culturala nacionala.

Es çò que Valérie Mazerolle analisa dins son estudi ric e perspicaç, eissida de la tèsi qu'a sostenguda a l'Universitat Blaise Pascal de Clarmont. Un libre d'istòria contemporanèa qu'a de qué passionar los amoroses de las musicas d'uèi coma los de la cultura occitana.

Amb discografia, bibliografia, illustracions, e de nombrosas citacions.

Colleccion Saber, edicions de las Premsas Universitàrias de Bordèu (Presses Universitaires de Bordeaux).

L'autora:

Valérie Mazerolle es doctor en istòria contemporanèa amb una tèsi, “Las voses de l'espaci occitan. Las Cançon occitanas : identitat e representacion (1965-1997)”, sostenguda en 2005 a l'Universitat Blaise-Pascal de Clarmont d'Auvèrnhe, jos la direccion de Catherine Bertho-Lavenir, professor a l'universitat París III-Sorbona Novèla, tèsi dont es eissit lo present obratge.