La Segonda Luna - Micheu Chapduelh - A Tots 59

La Segonda Luna - Micheu Chapduelh – ATS 59

En quauqu’un luòc, quauqu’un t’espera. Quo es ta memòria que zo te ditz. E lo temps nimai l’espaci li pòden ren. Vai-li ! Oblida los raisses, los vaures, las rebieras, las barraduras e los plais.
Lo monde es plen de caforchas e de ponts per passar tot quò. Trauca lo ga ! Aquí es pertot e uei es totjorn. Laissa parlar quela part de tu que te ditz que doman se ten emb uei coma passat-doman emb doman. Laissa-la repapiar que uei ses mai vielh de dos jorns que part-ier.
La sola vertat es au fons de ta memòria e, per ela, la prumiera flor qu’as culhida es benleu mai pres que la poma qu’as minjada queste matin, la peu d’orsa de ton reirpepet es benleu mai pres que ta darriera chamisa... 

A Tots 59, IEO Edicions - IDECO.

L'auteur:

Micheu Chapduelh (prononciar: [sa’dyɛj]) es un escrivan e chançonier occitan nascut lo 7 de genièr de 1947 a Agonac en Dordonha ente demòra enquera. Es un daus prumiers escrivans occitans-lemosins a aver utilizat la grafia classica. Participa a la revusda Lo Leberaubre consacrada a la literatura fantastica emb Jan dau Melhau. Son òbra es un boiradís d’umor negre e de fantastic. Escrivet de nombrosas chançons, coma per Joan-Pau Verdier. Presidet longtemps Novelum, la seccion peirigòrda de l’IEO. Es membre del conselh lingüistic del Congrès Permanent de la Lenga Occitana.