La grava sul camin - L'Evangèli de Bertomieu - Joan Bodon

La grava sul camin - L’Evangèli de Bertomieu - Joan Bodon

La Grava sul camin es un roman que foguèt publicat pel primièr còp en 1956. Es inspirat de l’istòria personala de Joan Bodon que foguèt forçat de faire lo servici del trabalh obligatòri (STO) en Silesia de 1943 a 1945. Lo libre conta, just après la Segonda Guèrra mondiala, las dificultats del retorn al país per un jove que ven del STO. Prefàci de Robert Lafont.

L’Evangèli de Bertomieu (1949) es parierament inspirat d’aquela experiéncia de sas doas annadas de STO en Alamanha. Es un roman inedit del temps de Joan Bodon (inspiracion autobiografica) que ne’n demòra sonque un manuscrich inacabat que se trobava pels papièrs de l’autor. Presentacion de Pierre Canivenc.

IEO edicions, colleccion A tots.

L'autor:

Joan BODON (Jean BOUDOU en francés) (Crespin, 11/12/1920 - Argeria, 24/02/1975), es un dels grands escrivans del mond modèrne. Marcat per l’imaginari del conte, tracta dins son òbra de tèmas universals o biblics per parlar de son intimitat amb la lenga occitana que vei demesir.

Extrach:

"Ai paur ! Darrièr la ròda de fèrre d’un vagon me soi aplatussat. Una bronzor se sarra sus l’autonbanh. Diriàtz las aigas d’una granda mar. Tot còp un flac, un sarrabastal. Las bastendas de la gara fumassejan, destrantalhadas. Ai paur.

Los Alemands son partits dempuèi un brieu. Nos an daissat aquí, en plena gara, al mièg dels vagons escarmentrats. E sèm demorats aquí, totes estirats, sens gausar bolegar.

Slava !... Slava !... Los Russes presonièrs cridan de l’autra part : « Slava !... » Me lèvi... Tot lo monde se lèva, galaupam amont cap al camin. [...]"