Las islas jos lo sang - Joan Ganhaire

Las islas jos lo sang - Joan Ganhaire - ATS 175

Vei-los quí tornats! Los personatges de Dau Vent dins las Plumas ( Atots n° 113) Joan-Francés Barnabeu Segur de Malacomba, la tendra Nani, lo fier Angelo e lors companhs laissan enfin las ribas de Garona per ganhar l’Anglaterra ent los espera Sir Oliver Cromwell. Viatge plen riscat ente un pirata se cacha darrier chaca ersa. Mai dangeirosas enquera son las vanelas e las plaças de London. Segur, s’i pòden rencontrar de las figuras simpaticas e plan conegudas, mas lo mai sovent, un s’i còpa de las testas, un s’i cotela, s’i pingalha. S’i raletan la mòrt e la traïson. Mas l’orror suprema sera tucada quante van segre las armadas anglesas dau costat de Dublin. Angleterra, Irlanda, vos setz ben las Islas jos lo Sang…

Colleccion A Tots 175, IEO edicions.

L'autor:
Joan Ganhaire (en francés Jean-Leopold Ganiayre) es un escrivan perigordin qu’escriu sas òbras en lemosin. Es nascut a Agen en Òlt e Garona lo 21 de mai de 1941. Après aver seguit sos estudis segondaris a Peireguers estudièt la medecina a Bordèu per s’installar com mètge en Peirigòrd ont naissèt sa vocacion d’escrivan occitan. Obtenguèt lo Prèmi Jaufre Rudèl en 2001 amb son òbra Lo viatge aquitan.

Extrach:
"Un còp sord fai trundir lo planchat, los tambors se calan d’un còp e un long e òrre planh monta de la fola. La testa dau rei es tombada. I vese un pauc mielhs, aurá. L’òme, totjorn d’eschina, leva laidonc una man que sembla tener un mochanàs e reculhís dessus las gotas de sang que rajan entre las pòsts. Puei se vira lentament, e d’un sole còp me veu. A ! mon amic, per un rapide, quo es un rapide ! Io auriá pas ‘gut mon espasa a la man, seriá desjà clavat coma choita a n’a pòrta de granja e tant mòrt coma lo rei Charles. Nòstres fers triqueten e comença la mai estranja partida d’escrima dau monde…"