Mon ombra e ieu - Laurent Cavalié (CD)

Mon ombra e ieu - Laurent Cavalié (CD)

Nòu annadas après  « Soli solet », lo novèl album en solò de Laurent Cavalié es saique son òbra mai personala.En nòtas impressionistas, i descriu de sentits personals o de luòcs qu'aima ben. Evòca tanben des personatges de la mitologia lengadociana, e agacha lo monde coma va amb un mescladís de tendresa, d'ironia e de revòlta…

Ausiretz dins lo disc los grands poètas lengadocians que Laurent Cavalié prèsa fòrça : Leon Còrdas, Joan Bodon, Auguste Fourés, mai i enrega tanben l'òbra poëtica sieuna, sens perdre de vista la dimension populara de son art.
L’acordeon i ten una plaça de tria, costejant, entre maitas percussions, l'anciana bomba de Lauragués e mai un instrument de còrdas tot novèl qu'a inventat amb lo laütièr Camille Paichelair.

De cançons sabentament sangmescladas, que barrejan d'un biais maliciós las musicas popularas del monde e nos remembran que la lenga es ritme tant coma poësia.

Laurent Cavalié, paraulas (fòra mencion contrària) e musica.

Coup de coeur de l'Acadèmia Charles Cros.
Label Sirventés / L’Autre distribution.

Titols:

1 Manhagueta - 3’36
2 La vila chica-chaca! - 4’19
3 La cançon de la fièra (Jean Boudou) - 4’22
4 Soi ieu lo lop  - 3’06
5 La dança de l’estela - 4’08
6 Mon ase n’es entristesit - 4’22
7 Dins un estable  - 3’41
8 Lo barcòt es de papièr  5’38
9 La nèit es estelada (Auguste Fourès) - 4’32
10 Quiquiriqui ! - 3’35
11 Fraternitat  (inspiré d'Auguste Fourès) - 2’42
12 Lo vira-l’ast de Sant-Jaume - 3’20
13 Mon ombra e ieu - 2’32
14 Que donarai ieu - 4’58
15 Lo poleton pichon  (Jean Boudou) - 3’25
16 E lo boièr laurava  (Léon Cordes) - 3’53

Extrach:

La cançon de la fièira

La pluèja tomba fina
sul fieiral, pel camin.
La pluèja tomba fina,
nautres bevèm de vin.

Sus una vièlha taula
aquí dins un canton,
sus una vièlha taula
demandam un pinton.

La canal totjorn raja
e podèm pas sortir.
La canal totjorn raja
e demoram aicí.

Botelha, puèi botelha,
fasèm perir d’argent.
Botelha, puèi botelha,
mas totis sèm contents.

Deman serà pas fièira,
nos caldrà trabalhar.
Deman serà pas fièira,
uèi nos anam bandar.

La pluèja tomba fina
sul fieiral, pel camin.
La pluèja tomba fina,
nautris bevèm de vin.

Paraulas : Joan Bodon

Musica : Laurent Cavalié.