Nivolet "Le petit nuage" - Andrieu Goyot

Nivolet "Le petit nuage" - Andrieu Goyot

Es un cònte per pichons, escrich en provençau maritime, grafia classica, que recebèt lo prèmi Jorgi Gibelin 2001 dau concors « Escriure en lenga d’Òc » deis « Amics de Mesclum », sota lo patronatge de La Marseillaise.
Es una parabòla sus lo viatge de la vida ambé seis espèrs, sei decepcions e sei bonurs que despinta ai pichons dins un obratge bilingue.

Cònte e illustracion de l'autor.

Editat per la seccion de l’IEO-06, ambé l’ajuda dau CREO-Provença.

L'autor:

Andrieu GOYOT es Borguinhon de naissença, mai apassionat de cultura provençala. L’autor, frequenta lei cors de l’IEO dispensats per Andrieu Saïssi a Grassa.
Escriguèt e illustrèt polidament aqueu pichòt cònte dau temps que, clavelat sus un liech, podiá que gachar lei nius córrer dins lo cèu.

Article de premsa:

Publica pèr l’I.E.O.06, Nivolet es un librihoun d’Andriéu Goyot que n’a fa lou tèste e li poulit dessin (uno aiglo e uno tèsto roujo espetaclous..).
D’óurigino bourguignono (Chaloun-sus-Souno), Andriéu Goyot decidè d’escriéure la lengo nostro quouro venguè s’istala à Grasso, i’a quàuquis annado, pèr ié travaia. Après un auvàri, se troubè clava dins un lié d’espitau, sènso poudé boulega. Poudié regarda que lou cèu e li nivo que courrien. Pensavo i pichot que poudien courre. Es ansin que greiè pau à cha pau l’istòri de Nivolet, clafido de pouësìo e de liberta que pertouquè la jurado de l’associacioun dis Amics de Mesclum que ié baiè lou 1é pres Jòrgi Gibelin 2001.
Lou nivoulet nous counvido au viage en lengo d’Oc emé la riveraduro en regard, emé un bello e grosso escrituro bèn asatado pèr èstre legido meme pèr li pichonet :
— Sabes, bèl enfant, coume nèisson e disparèisson li nivo?…

Article de Prouvènço d'aro 177 - Abriéu de 2003.