Goteta o los camins de la vida - Max Roqueta

Goteta o los camins de la vida - Max Roqueta

Vaquí Goteta, que Max Roqueta faguèt espelir en 1986, a partir d'istòrias inventadas per los escolans de Losèra. Es una gota d'aiga, enrebalada sens relambi dins los camins de la vida, que li fa gaug de descobrir tant de monds diferents amb sos engranatges secrets. Faula sus lo moviment e l'eternitat de çò que viu, Goteta es una leiçon d'istòria naturala e un percors poëtic encantaire.

Aital comença l'istòria:
"Aquí Goteta, goteta linda e clara e lusenta dins lo rai de solelh que la fai diamant. Goteta grèva de tot un pes de secrets, de mistèris e de rebats. Goteta que ten dins son ceucle magic tant de causas vistas, ausidas, tant d’istòria e d’istòrias. E d’entre tant de secrets, lo secret, saique de la vida.
Quand un rai de solelh s’arrestèt un brieu per l’agachar, Goteta fasiá pas que tornar acomençar lo grand ceucle que fasiá despuòi de milions d’ans. Mas totjorn nòva e jove e lèsta a refaire dins la gaug e la suspresa aquel vièlh camin sempre renadiu. Amb aquel bonur que la fasiá leugièra e viva per agandir lo grand cèl blau."

Pels joves a partir de 10-12 ans e mai pels adultes.

Prefaci de Claire Torreilles, illustracions de Maevi Colomina, legeires dau CD : Jean-Claude Forêt e Claire Torreilles.

Edicion bilingüa occitan-francés amb CD audio
Colleccion Los Camins de la vida, edicions Canopé - CRDP de Montpellier.

Extrach de la prefaci: Lo cant d'una prima etèrna
Max  Roqueta  es  totjorn  estat  interessat per  l’ensenhament  de  l’occitan,  plan  conscient  que  la lenga  transmesa  als  joves  es  una  lenga  que  viu.  Las questions  que  nos  pausava,  los  encoratjaments  que  nos donava èran la marca d’un interès vertadièr e totjorn plan informat. Quand li demandàvem per venir dins una classa, participar a un projècte o un rescontre pedagogic, disiá pas de  non.  Portava  sa  pèira.  L’istòria  de  Goteta que  nos agrada de tornar publicar n’es un bon exemple.
En 1986, d’ensenhaires d’occitan recampats per  Andrieu  Clement  dins  un  estagi  que  se  debanava  a Mende, dins çò que s’apelava encara «  l’Escòla Normala  », aguèron l’idèa de far escriure per los escolans una istòria sus lo tèma de l’aiga. Aital espeliguèt Goteta. Las escòlas a de reng inventèron las aventuras de la pichòta Gota. Dotze participèron  en  Losèra  :  Balsièjas,  Barjac,  Barra-de-las-Cevenas,  Beirac,  Bleimard,  Estables,  Lanuèjols,  Mende, Montrodat,  Pont-de-Montvèrt,  Sant-Fresal-d’Albujas. 
[...]