Foleton a paur dau negre - Patricia Jouve

Foleton a paur dau negre - Patricia Jouve

Patricia JOUVE ben conoissuda dins lo monde de la cultura e de la cançon occitana nos liure un polit librilhon per la ninèia : "Foleton a paur dau negre".

Bastit sus lo principi dei « escuregudas », aquèu cònte polidament illustrat permete a Foleton de caçar totei leis chauchevilhas que s’escondon dins lo sorne de la nuech e que l’empachan de dormir. Totei seis amics dau bòsc e de la nuech lo van rassegurar e li dire que lobatàs marrits, dracs, mascas, ògres, trevas … devon èstre remandats dins l’imaginàri dei còntes, que fau plus n’aguer paur bòrd que n’ia plus ges a l’ora d’ara dins lo monde.

Una polida istòria de contar ai pichons quora van au liech per lei amaisar avans de s’endormir.
La lenga es simpla mai richa d’un polit vocabulari tant sus lo mitan dau bòsc coma sus l’imaginàri de la nuech. La repeticion dei questions e respònsas ajuda a la compreneson de l’istòria e ajudarà a l’esplecha pedagogica dins lei classas.
Un librilhon de recomandar a totei leis ensenhaires, de la mairala au CE2.

Tèxte e illustracions de Patricia Jouve, en provençau (grafia classica).

Edicions AELOc.