Las que dançavan dins la lutz - Joan-Frederic Brun

Las que dançavan dins la lutz - Joan-Frederic Brun

Dins aqueste volum, Joan-Frederic Brun apregondís tanben son exploracion d'un univèrs d'aparéncia plan realista, lo dels terraires de causses e de montanhas que fan lo rèire país de Montpelhièr, entre vinhas, Larzac e Cevenas. Mas coma sovent en cò d'el, es pel biais de creaturas legendàrias o mitologicas, manlevadas als racontes del luòc o nascudas, se pòt plan, des quite imaginari de l'escrivan, qu'aquela exploracion nais e se desplèga. Los limits entre realitat e fantastic ne son d'aquí trebolats, fins a se dissòlver al benefici d'una autra realitat, saique mai presenta e mai vertadièra que la que la cresiam conéisser.

"Pròsa occitana", Colleccion animada per Felip Gardy. Trabucaïre.

L'autor:

Joan-Frederic BRUN nasquèt a Montpelhièr en 1956. Mètge espitalièr e cercaire, collaborator de la revista "OC", publiquèt en 1979 son primièr recuèlh de poèmas "Estius e Secaresas" seguits un pauc mai tard de dos romans dins la colleccion "A tots" : "Lo Retrach del dieu negre"(1987) e "Setembralas" (1994).

Extrach:

Una  sentida, doça mas indefugibla, lo destressonèt. Li semblava qu'èra pas sol. E pasmens lo silenci èra coma una cistèrna sens bolièiras. Abans de dobrir los uòlhs reveguèt en pensada l'ostau qu'avia visitat antan, e qu'èra benlèu aqueste, lo membre crotat amb la lònga taula de fusta, las joventas miraclosament polidas que cantavan sus estranhas e pertocantas cançons. Realitat o sòmi ? Pasmens aguel sovenir èra escrincelat dins son èime amb una precision especiaclosa. Revesiài aqueles uòlhs, grands lacs d'aiga montahòla ont tota pensada s'anava negar. [...]