Leis aventuras de Joseta Kroner - Matthieu Poitavin

Leis aventuras de Joseta Kroner - Matthieu Poitavin

Lo fuelheton de l’estiu, en provençau !

Aqueu racònte es estat publicat en fuelheton sus lo blòg dau Tam-Tam en temps vertadier. D’octòbre de 2013 fins a agost de 2014. Mercège francament lei lectors qu’an seguit cada jorn aqueste « word in progress » per i porgir soscadissa e sentits. Lei personatges e lei situacions d’aqueu racònte estènt de ficcion dins son entier, tota semblança ambe de personas ò de situacions que vos parlan ò que vos podrián parlar es d’azard.

Version Francèsa e provençala dins aqueste libre.

Edicions L'aucèu libre.

E si v’aconselhèvam, car lector, drin de literatura tà las vacanças ?
Aquí lo huelheton tragicomicòrocambolesc deu Matthieu Poitavin : Leis aventuras de Joseta Kroner. Publicat suu blòg Lo Tam-Tam d’octobre de 2013 entiò aost de 2014, los episòdis que son arrecaptats en un libe de format petit, pareishut en çò de l’Aucèu libre. Nada nautat, ce’m responetz ? Be, de que’s grasir shens nat besonh de 4 G. De mei, en version bilingüa occitan-francés, s’ac voletz prestar au vòste vesin de TGV non-occitanofòne.

Autor, professor d’occitan provençau e d’arts visuaus a Aurenja, lo joen Matthieu Poitavin qu’estudiè lo cinèma, las letras modèrnas puish l’occitan. Qu’estó premiat en 2014 entau recuelh de navèras Esperit de Sau, tostemps editat en çò d’Aucèu libre, o enqüèra tau tèxte de la cançon Soleu rotge interpretat per Liza l’Occitana a l’Eurovision 2006 de las lengas minorizadas. Aquera publicacion de Las aventuras de Joseta Kroner, qu’ei lo parat de tornar descobrir la soa pluma susprenenta, quasi filmica, a còps carrinquejanta e cruda.

Permèr, un títol, qui detalha las etapas deu tròç de huelheton a viéner. Que n’i aurà atau trenta tres. Cada trocicòt de l’istòria que’ns suspren. Lo hiu que’s desarromèra au briu de l’inspiracion, segon la temporalitat d’un huelheton a la mòda vielha, on l’autor e’s mia l’escenari a mesura. Que passam d’ambient de filmes d’espionatge a portrèits trufandèrs, en arrevitadas destimborladas. Aquò dit, qui ei aquera Joseta Kroner ? Existeish, au mensh ? De tant qui ei l’objècte de cobedessa e de desir enairejants, que poderem dobtar de la soa existéncia. Joseta Kroner, la misteriosa, mitat divà, mitat pin-up, l’estela quasi estupada d’un atge d’aur cinematografic, ua star harta deu jòc de la celebritat, e qui’s vòu ganhar lo dret de desparéisher. Au darrèr, lo terrible Rick Léo, joen permèr deu cinèma, qui s’a besonh ua estela madura au ras, entà s’assegurar ua plaça au som. Lo personatge dab qui entram en l’istòria, lo Rachid : l’òmi doç, lhèu fade, lo cineasta qui s’a perdut la musa, lo qui n’a pas sabut retiéner-la. Adarron d’eths, ua fresca de personatges que’s desplega, au passat qui torna gessir shens díser “vira”. Los ròtles estonants que’s hèn l’escaleta d’un episòdi a l’aute, en crotzar las destinadas.

L’escritura fluida e imatjada, que’s hè a còps bruta, en descríver sèxe e violéncia untada de drògas, hèitas divèrsas morbidas, on esperam véder a ganhar los bons. Los noms de la nosta realitat que son escarnits - mèrcas comerciaus, noms de celebritats, d’òmis politics, de mèdias... - dab pro de sagacitat tà botar l’arríder aus pòts deu lector. « Leis personatges e lei situacions estènt de ficcion dins son entier, tota semblança ambe de personas ò de situacions que vos parlan ò que vos podrían parlar es d’azard » çò ditz l’avant-perpaus. Totun, se las vòstas passejadas estivencas e’vs pòrtan deu costat de Nimes, de Marselha,
deu Portugau, o preu cèu en avion, be’n preneràn bahida un aute gost.
Article de Caroline Dufau, Lo Diari 38 (Julhet / Agost 2017).