Una ponhada de clavèls - Nòvas en occitan - Sèrgi Viaule

Una ponhada de clavèls - Nòvas en occitan - Sèrgi Viaule

En aquesta debuta de sègle XXIen, la novèla es un genre d'expression de mai en mai usitat dins la literatura nòstra. Dins aqueste exercici singular, Sèrgi Viaule s'i fa de man de mèstre desempuèi bèl brieu. "Fotrairòl", son darrièr recuèlh publicat per aquestas meteissas « Edicions dels Regionalismes » coneguèt un interès bèl. Lo public ne demandèt e ne tornèt demandar. Amb "Una ponhada de clavèls" es tornamai una garba de vint-e-quatre tèxtes que nos ofrís l'autor albigés. Son divèrses dins los tèmas evocats, mas totes de factura classica. Cada novèla es una observacion aguda de la societat occitana en cèrca d'identitat dins una temporada d'exagonizacion forçada e de mondializacion despietadosa.

Se la qualitat primièra del novelista es d'aver d'imaginacion, es a creire que Sèrgi Viaule ne manca pas. Cada pèça d'aqueste recuèlh carreja son fais de suspresas. Lo legeire anirà, tròç aprèp tròç, d'embalausida en encantament. Las casudas de cada narracion son totjorn inesperadas e espantantas. Avèm aquí un recuèlh mirgalhat ont altèrnan umor e poesia. Cadun i posarà son sadol d'emocions.

Edicions Les Régionalismes.

L'autor :
Sèrgi Viaule nasquèt en 1950 en Albigés. Poèta a temps destorbe, practiquèt cent mestièrs, visquèt milanta aventuras. Escrivan descobèrt per las « Edicions dels Regionalismes », a fòrça escrich e publicat. Sa produccion es divèrsa : romans, novèlas, racontes e poesias. S'es tanben, pauc o pro, especializat dins la traduccion d'ensages e d'òbras literàrias. Es cronicaire-blogaire e critic literari dins mantun mèdia (La Setmana, Lo Lugarn, etc…).