Novèlas sornas - Magalí BIZOT-DARGENT

Novèlas sornas - Magalí BIZOT-DARGENT


Ancuei avèm lo plasir de retrobar Magalí BIZOT-DARGENT embé de « Novèlas sornas » mas sempre embé un chícol d’umor que permete d’alenar, de bofar, de dedramatizar quora lo sorn vèn fòrt de tròup. Un umor, que de còup que l’i a, es un pauc grinhant a la maniera dau filme de Franco Brusati « Pane e cioccolata ». Aquesti novèlas vos faràn viatjar tra l’Atge-Mejan e lo jorn d’ancuei sensa esfòrç, quasi de maniera naturala. Ieu, lo faguèri aquest viatge dins lo sorn e vos convidi a lo faire tanben. « Enavisatz-vos que si pòu trovar lo bònur meme en lu moments lu mai sorns. Basta si renembrar d’acendre lo lume. ».

Edicions IEO 06.

L'autora:

Marselhesa de còr, Magalí Bizot-Dargent a pres mai d’un camin que l’an menada au teatre coma comediana, es puei venguda cantaira au dintre dau Lamparo e ara ambé Misé Babilha.

Article critica:

Magalí Bizot-Dargent es una bèla persona que s’interessa a tot e en toi.
La sieu vida es plena coma un òu coma l’auria poscut dire lo poèta Jòrdi Peladan. Siguèt tot a l’encòp ensenhairitz remirabla en Z.E.P, cantairitz dins mai d’un còro polifonic coma aqueu de Misé Babilha ò embé Manu THERON (La Madalena), actritz dins la chorma d’Andrieu NEYTON, pintairitz figurativa (premiera de cuberta), fotografa avertida, militanta politica e associativa, genealogista, escrivana de tria, sòcia de l’I.E.O e dau PEN-Club, membra dau C.O.P.L.P.D.P.D.E, Consèu Occitan Per La Promocion Dei Ponchs D’Exclamacion !
Faguèri conoissença embé la sieu escritura de maniera anonima en lo 2006 en tant que membre de la jurada dau concors literari de l’associacion « Leis Amics de Mesclum ».Magalí, presentava la novèla « Aquitectura literària » que recevèt lo premier premi en la categoria « Novèlas ». Siguèri pivelat per l’originalitat dau subjèct, la riquessa de la lenga, l’estile viu, ardit, plen d’espontaneïtat, de franquessa, de natural e de sinceritat. Sus lo còup, lo nòstre Institut la publiquèt sus lo sieu site per fin de la faire conóisser e li donar un lectorat. Despí siáu fan, apassionat, admirator, encapriciat, enfebrit de tot cen qu’escriu. Magalí a pas decessat d’escriure per lo nòstre grand plaser. En lo 2010, publiquèt « Questions essencialas e autreis escrichs minusculs » que presentèt tra autres sus lo pontin dau cafè « Belles Lettres » au festenau dau libre de MoansSartòu. Un libre tot a l’encòp umoristic, tendre e clafit de poesia. En lo 2011 revenguèt embé l’escritura dei sieu « Cronicas Pacolinas », libre a destinacion de la joinessa mas que pertòca tanben lu adults, una mena de viatge iniciatic d’una adolescenta. En lo 2014 « Esquissas per un retrach de l’ombra » explòra lo monde dei ombras sieui, familha, amics, ancians… Embé « Minusculitats e autrei essencialitats » publicat en lo 2015, Magalí BIZOT-DARGENT nos entraïna en de tròç de vida poetics que se l’i fèm pas mèfi, l’i podèm passar a costat.
Ancuei avèm lo plasir de retrobar Magalí embé de « Novèlas sornas » mas sempre embé un chícol d’umor que permete d’alenar, de bofar, de dedramatizar quora lo sorn vèn fòrt de tròup. Un umor, que de còup que l’i a, es un pauc grinhant a la maniera dau filme de Franco Brusati « Pane e cioccolata ». Aquesti novèlas vos faràn viatjar tra l’Atge-Mejan e lo jorn d’ancuei sensa esfòrç, quasi de maniera naturala. Ieu, lo faguèri aquest viatge dins lo sorn e vos convidi a lo faire tanben. « Enavisatz-vos que si pòu trovar lo bònur meme en lu moments lu mai sorns. Basta si renembrar
d’acendre lo lume. »
Joan-Pèire BAQUIÉ, president onorari de l’IEO-06, publié sur le site de l'IEO 06 le 26 septembre 2024.