Païsatges d'Oc - Riccardo Carnovalini

Paesaggi / Païsatges / Paysages d'Òc - Riccardo Carnovalini

42 images d'Occitània en chamin da Vinai a Vielha = Païsatges d'Òc

Malgrat las fatigas dal lòng chamin e lhi desnivèls considerables de l'Occitània a pè, ai trabalhat sia en película (médi format) qu'en digital, me charjant 7 kg d'atreçaduras, comprés lo cavalet.
Es pas aisit fotografar lo païsatge dins un viatge a pè organizat embe un calendier de tapas inflexible. Sovent me trobavo dins la lueia justa embe la lutz enganaa, o pura derant a un subjèct gaire sinhificatiu embe una lutz mai bèla.
Quand ai polgut, ai esfruchat las premieras e las darrieras lutz dal jorn, aquelas rasentas de las ombras lònjas e de las colors chaudas, començant la jornaa avant de mi companhs de viatge e la sarrant masque après que lo solelh s'era avalit darreire las colinas de las montanhas d'Occitània.
Image après image a prés forma lo conte de l'istòria dal païsatge, fruch dal rapòrt entre òme e ambient. D'un cant la cultura, la lenga e lo trabalh de l'òme, de l'autre la natura, dins totas sas expressions. Un rapòrt que da profond e universal a mudat embe l'anar del temp, fins a esflorar, embe la preissanta omologacion dal mond, lo ponch crític. Lo trabalh agrícol dins lhi airals marginals es devengut exclusiu e esporàdic, e lhi espacis laissat da l'òme se n'es pauc a pauc reapropriaa la natura. A la renaturalizacion s'acòsta lo fenomèn parallèl dal desraïsament, de l'abandon de la cultura e de la lenga, que d'aquel territòri es part integranta, ne representa la naissença, la creissença, la cultura.
Embe atencion particulara ai ponchats lhi objectius sus lo païsatge umanizat: perque es aquí que viu lo presidi de la lenga. Es lo païsatge cultivat, aquel ente s'auvisson encara lhi belats de las feas o lhi picons de las vachas, aquel ente la vinha es encara curaa amorosament, aquel ente lo viòl e la dralha son pas frequentats masque per evasion e per se retemprar da l'èinha.
Lhi ambients de la lenga occitana son lo natural prolonjament di país e de las maisons que, per de sècles, an sentut vibrar lhi sòns màgics de la lenga qu'a acomunat un airal d'Euròpa demorat da 13 milions de personas. Es per aquò qu'en salvant un ambient se salva una lenga.

Occitània a pè. Text en italian, en occitan e en francés.

Edicions Chambra d'Òc.