Legendari de las despartidas - Joan-Frederic Brun

Legendari de las despartidas - Joan-Frederic Brun

Libre de poemas occitans, amb versions francesa e anglesa.

Joan-Frederic Brun es conegut per sos romans e novèlas (Septembrales, Lo Temps clar de las Encantadas) e pel raconte de sa davalada als infèrns aprèp l'accident de caval que manquèt de li costar la vida (Luònh).

Lo poèta Brun aviá pas publicat qu'un sol recuèlh, Estiu e secaresa, fa exactament 30 ans, mas aviá pas quitat d'escriure. Legendari de las despartidas recampa las seguidas poeticas mai importantas escrichas despuèi lo primièr e unic volum. S'i mesclan doas inspiracions : d'un band la meteissa passion incambiada e viscerala per la garriga e d'autre band la fina amor dins la tradicion lirica occitana de l’Edat Mejana, amb sos dos caractèrs, compliment de se per l’amor non complit e rigor formala. Lo poèta s’inscriu dins la tradicion del trobar clus, amb son gost del poèma escur impecablament rimat, mai que mai amb sa dileccion pel sonet decasillabic de la poesia classica italiana. Dins Lo reposc de las oras, se maridan l’inspiracion naturala e amorosa dins lo sens de la languison e de la renóncia. Bèu rocam, Degràs de pèira tindarèla, Seuvas serranèlas son de meditacions poëticas, ont la secaresa minerala pòt figurar l’ascèsi sentimentala e que fan soscar a la pensada d’Eraclit per las formas brèvas de las senténcias.

Coma lo poèta a volgut defugir « lo mortifèr cap e cap de l'occitan e del francés », prepausam una edicion trilingüa, que convida tanben l'anglés a aquel pivelant e enigmatic Legendari de las despartidas.

Edicion trilenga (occitan, francés, anglés). Revirada anglesa per Joan-Frederic Brun, Christophe Razaire & Louise Esher. Version francesa de Joan-Frederic Brun.

Jorn.

Cobèrta: Frontispici d'un obratge d'astronomia dau sègle XVI.