Bèth peu de sau - Joan Loís Lavit

Bèth peu de sau - Joan Loís Lavit

Las aventuras gaujosas e arridentas deu Comissari Magret, perseguint bandolèrs qui esvarjan la vila e lo país. Un plen tistèth de benalejas e de suspense.

Negre qu’ei l’ahar au país de las cantas : còs de hemnas desmembrats, pergam istoric raubat, panatòri d’engibana electronica, shens comptar la disparicion d’ua inspectora de polícia… Quina mesclanha aquestes torns en vila !

Lo comissari Magret – qui s’èra permetut quauques dias de vacanças – que deu tornar, viste hèit, tà miar l’enquista.

E s’i va escàder aqueste còp ?

Joan Loís Lavit que maneja dab gormandèr l’umor e las suspresas tà troçar un beròi roman policièr e balhar plaser au legedor : Bèth peu de sau.

Edicions Letras d'òc.

L'autor:

Joan Loís Lavit es vadut lo 29 de junh de 1959 a Lorda. Familha lavedanesa occitanofòna, mair regenta e pair obrèr d’usia. L’occitan qu’ei tostemps estat e qu’ei la lenga de la familha.
Leguidor de bandas dessenhadas e de SF americana, que descobreish la literatura occitana e l’occitanisme a 17 ans, cap a la fin de las annadas 70 a l’Escòla Occitana d’Estiu e dab l’Institut d’Estudis Occitans.
Especializat en ensenhament de l’occitan a l’escòla publica desempuish 1982 (e recentament retirat).
Que’s lança dens l’escritura a l’aurèra de las annadas 90.
Manejant l’escritura teatrau autanplan com l’escritura de romans e novèlas, qu’ei adara vadut un deus autors occitans de compte har.