La segoundo vido de Mirèio - Pèire Pessemesse

La segoundo vido de Mirèio - Pèire Pessemesse - Coumèdi dramatico en quatre ate emè un proulogue

Mirèio, la Mirèio de Frederi Mistral, aguèsse viscu jusqu'à vuei, quant de tèms aurié agu ?
Ansin coumenço la pèço en escricho pèr Pèire Pessemesse pour l'année Mireille. À chasque ate, vesènt uno Mirèio qu'aurié agu, 30, 40, 50, 60 e 70 an...

Lou mounde chanjadis pantaia pèr Pèire Pessemesse qu’a fa mirando sus li pountin de tiatre s’óufris vuei à la leituro.
Lis efèt teini de la meso en sceno, lou jo dis atour e la coumplicita dóu public soun plus aqui, mai lou bèl art vivènt d’aquelo peço se retrobo entié dins l’escrituro couladisso de l’autour talentuous.

En 2009, lou tiatre d'Ate faguè sucès emé La Segoundo vido de Mirèio, la pèço de Pèire Pessemesse, que jogo lou role dóu Mèstre de Maiano.
Noumbrous soun aquéli que l'an visto, n'en vaqui lou tèste.

Edicioun Prouvènço d'aro.

Estraches:
Me souvène d'aquéu mes de febrié 1859 que sourtiguè lou libre de Mirèio... E iéu, jouine escrivan prouvençau entre tant d'autre, tout en un cop venguère celèbre. E aro, auriéu de remembra aquel evenimen dins la crounico de l' Armana prouvençau...
Mirèio, aguèsse viscu jusqu'à vuei, quant de tèms aurié agu ? I'aurié fa... veguen... nascudo en 1844... supause que sarié sa dato de neissènço, qu'en 1859 quand pareiguè lou libre, tóuti aquéli que l'an legi auran nouta que dins si quinge an èro Mirèio. E dounc vuei ié farié 62 o 63 an, siegue 16 an de mens que iéu...
La chato de Prouvènço qu'ai cantado sarié uno vièio femo, que li femo vieiisson bèn pus mau que nautre, lis ome, aurié subre-viscu à la guerro de 70, à l'oupera de Gounod e à moun Pres Nobel de literaturo, se sarié maridado emé Vincèns o belèu pas, que n'aurié espousa un autre, lou pastre Alàri o bèn lou fiéu d'aquéu Marqués de Barbentano que m'empressiounavo tant quand venié rèndre vesito à moun segne paire e que iéu tout pichoutet entendiéu de sa bouco li proumiéri fraso prounounciado en francés...
... dins aquéu pouèmo ai tout encatafourna, tout ço qu'ai viscu d'enfant, la vido tradiciounalo agricolo d'un terraire que  l'evoulucioun di teinico e la lengo ensignado is escolo menaçavon de prefounda, i'ai enclaus dedins lou passat glourious de noste païs quand rèi, comte, aristoucrato, clergue e bourgés s'enourgueïssien de parla nosto lengo mespresado e de l'ilustra emé si cansoun e si pouèmo !