Man dins lo cèl aganti l'astre - Volume 3 - Lo silenci - Franc Bardòu

Man dins lo cèl aganti l'astre - Volume 3 - Lo silenci - Poèmas a la Leona de l’Atlàs: 1998-1999 - Franc Bardòu

Man dins lo cèl aganti l’astre es una òbra uèi enfin editada en tres volumes, que recampa los poèmas escrits entre las cimas de l’esperança amorosa e los tomples del desespèr contemplatius.

Aqueste volume 3, Lo Silenci, tresen e darrièr libre dedicat a la Leona de l’Atlàs, al final del sègle XX, es ja  estat publicat en pròsa en numèro especial de Lo Gai Saber, dins lo libre titolat Atlàs Londanh. Aquí, pel primièr còp, se tròba establit en vèrses, e traduit al francés per l’autor. Descriu, d’estacion en estacion, la peregrinacion d’un desesperat d’amor uman cap al destacament d’amor incondicional e metafisic. L’acte sublimatòri en qué consistís aqueste cortègi de poèmas se volguèt èsser a l’encòp un renonciament e una liberacion. Lo Silenci es aquesta cambra desertica de ressons que dedins l’amada daissèt lo sieu amant, ont sonque los vèrses respondián encara als vèrses, d’ara enlà, fins a l’abandon total.

Obra poetica en occitan - revirada en francés per l'autor.

Illustracion cobertura d’Hélène Rejembeau. Foto de l'autor per Christel Rey.

Colleccion Votz de Trobar n°34.

Edicions Tròba Vox.

Estrach:

Sonque un dralhòl aital, semenant los mistèris,
        m'oblidèt en ton si coma l'aura dins l'aura,
                traversant la grand nuèit d'abséncia e de silenci.

Cadun ara demanda ont me n’èri anat ;
        qué dire als esmarrats ? Sonqu'un jardin de ròsas
                en ta man calinhaira amont, aprèp l'asuèlh ?