Contes de Gasconha (II segonda garba) - Joan Francés Bladèr - ATS 22-23

CONTES DE GASCONHA (Tome 2 - Segonda Garba). Contes mistics e legendas. Joan Francés Bladèr

... que trobam dens aquesta segonda garba de Contes tot lo tresaur de las tradicions miticas et devociosas de la vièlha Gasconha amassadas au sègle passat per « l'escriba intègre e piòs ».

Los Contes de Bladèr que son un màger tròç de la literatura gascona, e occitana en generau, mes que son de mau léger entau gran public, qui auré besonh d’estar ajudat, d’estar gavidat, d’aver explics balhats per especialitas d’aquera forma de literatura orau. Çò qui pòt descoratjar los legedors, tanben, que son las repeticions de formulas a l’interior de cada conte, qui, tornant ric per ric o pòc se’n manca, e’n hèn la lectura monotòna e a bèths còps avegiva. Ad aqueths legedors, que conselham la lectura de la Segonda garba deus Contes de Gasconha. Dens aqueste volume que i son hèras de contes pro bracs com entà non pas aver besonh d’aqueras mèrcas narrativas qui son las repeticions de formulas, que i son tanben contes d’ua pagina (Las malas òbras deus caperans) o mensh (Las dançairas castigadas, Lo rei Artús, L’òme deguens la lua, Lo Drac…), qui’s legen d’ua tirada e presentan aspèctes diferents deu legendari gascon que las sempitèrnas aventuras d’eròis invicibles com Joan de Calés.

Dens aqueste segon volume de l’edicion deus Contes de Gasconha, un bèth volume de 324 p., que trobaratz duas granas partidas, d’ua part los Contes mistics e d’auta part las Legendas, dab cadua mei d’ua sòst-partida, qui hèn un ensemble plan variat e ve daràn un vertadèr plaser de lectura.

 
Joan Francés BLADÈR, Contes de Gasconha Segonda garba,

Editions IDECO - Collection A Tots (ATS 22-23) - 1976.