Lo papagai e lo robòt - Sèrgi Gairal

Lo Papagai e lo robòt - Sèrgi Gairal

Dins una vilòta, de cans desapareisson ; la premsa ne parla, l’inquietud ganha. Florença, jove retirada, a paur pel seu Perlon… Decidís d'enquistar.
Pauc après, un papagai, ganhat dins una lotariá, puèi un robòt, qu'es lo prèmi d'un concors scientific, arriban totes dos a cò de Florença. Parlan dels umans, de la societat, de las lengas, del progrès e qué te sabi mai...

Es dins aquel contèxt que l’ostal aculhís dos  "membres" novèls, un papagai, puèi un robòt, que lor preséncia insolita serà pas sens consequéncias...

Un roman contemporanèu, agradiu, que mescla las generacions, coma l'autor o sap faire, mai tanben una "faula modèrna".

Colleccion A Tots n°206, IEO Edicions.

L'autor:
Sèrgi GAIRAL. Naissença : 19 de febrièr de 1948 a Castras (Tarn). Licéncia d’espanhòl a Tolosa. Professor d’espanhòl. Retirat dempuèi 2008. Corses e talhièrs d’occitan. Collaboracion als diccionaris de Cristian Laus, Cantalausa, e lo metòde Cap a l’Occitan (IEO). Conferéncia sus l’emigracion roergassa en Argentina.
Maridat, tres enfants.

Estrach :
"... Vesèm pas perqué contunhariam pas de parlar la lenga de nòstra tèrra.
– Sèm plan d'acòrdi amb tu, ditz Antòni.
– Ieu tanben.
– Lo papagai ! s'exclaman las doas joventas. Lo papagai a parlat !
Las doas joventas ne'n revenon pas e rison. Mario las acompanha, mentre que Florença e Antòni se contentan d'un sorire leugièr. Mario explica :
– Aquò li arriba de mai en mai sovent."