Lo XIII, aquò òc ! - Alan ROCH

Lo XIII, aquò òc ! - Alan ROCH

Oc ben, l’occitan es una de las lengas naturalas del rugbí de XIII. La pròva n’es aqueste libre, que mescla totas menas de genres literaris, de la cronica esportiva a la novèla.

Cristian Almerge e Albert Bueno prepausan de cançons al torn del XIII, Jo Salès conta l’epopèa d’una equipa minerbesa a la debuta de las annadas cinquanta, e lo musician Felip Carcassés se remembra lo legendari Papillon. Prefaciat per Joan-Francés Albert, ensenhaire a la calandreta de Carcassona e director esportiu del club tretzista de la vila, l’obratge pòrta enfin la marca d’Alan Roch amb mai d’una de sas cronicas vodadas al XIII.

Alan Roch a assegurat la coordinacion d'un obratge que i an collaborat: Joan Francés Albèrt, C. e C. Almerge, Mirelha Braç, Felip Carcassés, conselhièras d'occitan academia de Montpelhièr, Jò Salès, Sèrgi Viaule.

I trobaretz la novèla "Lo rugbí" de Ramon Gogaud e la reedicion del roman de Raimond Gougaud e Alfrèd Raucolas: L’Afirolada (1981). Lo libre torna prene tanben una novèla de Sèrgi Viaule: Cossí lo XIII salvèt la planeta.

Colleccion Vendémias n°80, co-edicion Institut d’Estudis Occitans: IEO-Aude e IEO-Lengadòc.

Amb lo concors dau Centre cultural occitan Lo Camèl.

L'autor:
Alan Roch es nascut en 1952 a Carcassona dins Aude. Regent puèi animator cultural, es tanben autor, traductor e contaire.
Foguèt secretari general a l’IEO (1981-1986).

Article de premsa:

Alan Roch e lo rugbí de tretze es una istòria de passion que dura. Es una istòria d’amor e de fidelitat. Per tan luènh que poguèssi remontar dins lo temps, e aquò nos pòrta al sègle passat, ai totjorn conegut Alan Roch fidèl al seu club de Carcassona, los famoses Canarís. La fidelitat es benlèu çò que caracteriza lo mai lo barbut de La Trivala : fidelitat a l’A. S. Carcassona, mas tanben fidelitat a la lenga nòstra e a nòstra identitat occitana. Fidelitat atanben a l’Institut d’Estudis Occitans que i milita fèrme desempuèi un quarantenat d’annadas, e benlèu mai. Alan Roch es estat un subredotat e precòç afogat de XIII e d’òc.   D’efièch, en mai de son engatjament per la cultura occitana, l’autra afògament d’Alan Roch es lo rugbí. Mas mèfi ! pas quin rugbí que siá, lo mai atletic e espectacular ! Alavetz, avètz totes reconegut lo rugbí de XIII. Un rugbi talament occitan que sul continent (Granda Bretanha es una archipèla) se jòga pas qu’en Catalonha e en çò nòstre. Se i aviá una logica endacòm, los bailes de la federacion « francesa » ne deurián tirar un jorn las consequéncias e se batejar condreitament « Federacion occitana ». Mas ne sèm pas encara aquí... l’alienacion nacionala ocupa planes esperits, emai los mai ovals….  seguida de l’article aquí  => http://lo.lugarn-pno.over-blog.org/2019/01/alan-roch-e-lo-rugbi-de-tretze.html

Article de Pèire Rabasse, publiat lo 15 de genier de 2019, dins Lo Lugarn.