Pouesies Gascoues (1620) - André Du Pré

Pouesies Gascoues (1620) - Andrèu Du Pré

Edicion critica per Joan-Francés COUROUAU.

Las poesias d'Andrèu Du Pré (André DU PRÉ), poèta gascon de lenga d'oc dau XVIIe segle.

Andrèu Du Pré qu'es l'autor misterios d'ua òbra unica Les Fueilles Sibyllines, publicada l'an 1620 a Leitora (Lectoure, dep. de Gèrs) qui compren ua partida redigida en occitan de Gasconha, las Pouesies gascoues. Òbra magra, constituida de setze sonets e duas cançons, assegura totun a son autor ua plaça preponderanta dens la literatura barròca occitana, a costat de Godolin, Larada, Adèr...

Autor polimòrf, DU PRÉ que s'intègra mai dens las categorias acostumadas. D'aparéncia petrarquejant e neo-petrarquejant, es tanben pregondament marcat per l'esperit barròc de son temps en tot presentar tanben trèits qui l'aparentan aus libertins de mors. Particularament sensible a la natura, es un poèta qui mestreja mervilhosament plan la lenga occitana qui es en çò d'eth vigorosa, rafinada, complèxa e ambigüa.

Aquesta edicion critica (la permèra a paréisher en occitan) per Joan-Francés COUROUAU, vòu tornar justicia a un escrivan desbrembat mès qui illustra totun perfèitament l'extrèma complexitat e la grana qualitat d'un moment de creacion literària occitana.

L'autor:

Joan-Francés COUROUAU, agregat d'alemand, se consacra a l'estudi de la literatura barròca occitana de Gasconha (sègles XVI e XVII). Aprèsta la tési sus Bertran Larada. S'interèssa tanben a la literatura modèrna de Pirenèus (Filadèlfa de Yerda).

Edicions SFAIEO (Seccion Francèsa de l'Associacion Internacionala d'Estudis Occitans).

Colleccion « Edicions de textes », n° 2.

Extrach:

De toun co l'Hyuer pren lou mage fret que porte,

La primauere pren de ta facie sas flous,

E de moun co l'Estiu pren sas granes calous

So de l'aute sasoum de mi cau qu'encouè sorte:

De mous souspis aus caus gautelani la porte

Pren soun bent a la plouge, ere pren de mous plous,

Peres d'angouesse, pren de mas berdes doulous,

Las poumes d'andureu, e tout frut de tau sorte.

Dab aqueres sasous jou n'eri pas nescut,

Toun oueil y hec l'Estiu e puchs aprop crescut,

Churpec de toun Hyuer la plouge e bent qu'amie.

L'an se pintre en anet, lous anets soun d'un tros,

Tourne dounques de l'en ta mitat dab la mie,

E atau toutis dus nou seram plus qu'un cos.